Wanted: Papa Jack. Advice Please?

Isang araw, nagdesisyon si Lea na tumungo sa Hilaga ng kanilang baryo. Nasa bandang hilaga raw ang kayamanang ninanais ng kanyang ama. Mabato and dinaanang ito ni Lea. Maraming pagsubok at unos. Ang nais lamang ni Lea ay makamit ang sinasabing kayamanan na itinuro ng kanyang ama. Masaya s’ya sa paglalakbay na ito. Kahit maraming bagyo, sumige lamang s’ya at nagpatuloy na lumakad para lamang sa ikatutuwa ng ama.

May nakita s’yang isang taong naglalakad pa-silangan. Kinausap n’ya ito at naging magkaibigan sila. Kinwentuhan ng taong ito si Lea kung ano’ng meroon sa bandang silangan at sinabing dito makikita ang totoong kaligayahan at kayamanan na kanyang hinahanap. Nakumbinsi nito si Lea at napaisip s’ya kung sasabay ito sa kaibigan o ipagpapatuloy ang paglalakbay na nais tahakin ng ama. Hindi n’ya alam ang pipiliin. Nag-isip s’ya ng matagal at pinaghintay ang kaibigan hangga’t hindi pa s’ya nakakapagdesisyon. Nainip ang kaibigan at iniwan si Lea. “Hahabulin ko ba s’ya o magpapatuloy ako?” gulong-gulong tanong nito. Hindi pa rin s’ya makapagdesisyon. Hindi na n’ya makita ang kaibigan sa kalayuan.

Nakaramdam na ba kayo ng ganitong pangyayari sa buhay? Mahirap ang ganitong sitwasyon, hindi mo alam ang pipiliin mo. Aling ang tama at alin ang mali? Kagustuhan mo o kagustuhan ng mahal mo sa buhay? Minsan, may mga pagkakataon sa buhay ng isang tao na napapalampas ang mga magagandang oportunidad nang dahil sa mga taong nakapaligid at nakakaimpluwensya sa iyo. “Mag-doktor ka!” sabi ng iyong ama, pero ang gusto mo talaga ay maging pintor. Ano ang pipiliin mo kung nasa ganito kang kalagayan?

Bitin ang istoryang isinalaysay ko kani-kanina lamang. At alam kong magtataka ang mga taga-sunod, tagapagbasa, awdkyens ko dahil sa post na ito. Karaniwang kasaysayan ang paksa ng blog na ito pero, bilang kontribyutor at patnugot ng blog na ito ay humihingi ako ng kaukulang pagpapayo tungkol sa sitwasyong aking kinapapalooban ngayon. At nais kong humingi ng advice sa pamamagitan ng prediksyon n’yo sa susunod na mangyayari sa kwento na aking inilahad sa itaas (Note: hindi po Lea ang pangalan ko.) Kung sino man ang makapagbabasa nito, sana’y magkomento na lamang sa ibaba ng post na ito.

At upang malaman ang sitwasyon ko ngayon, naririto ang importanteng detalye sa ibaba:

Nais ni ama na maging isa akong guro balang-araw. Pumayag ako dahil pumasa naman ako sa isang unibersidad na magaling sa aspeto ng paghuhubog ng mga guro sa kinabukasan. Masaya ako noong una, lalo na noong pinayagan akong magpakadalubhasa sa kasaysayan (ang gusto talaga nila ay mag-english raw ako, pero ayoko.) Nakita kong may kakayahan ako rito, at kahit papaano, magaling/may-alam. Ngunit, pumasok at umusbong ang pagmamahal ko sa larangan ng sining at dyornalismo. Doon na nagkalat at gumulo ang utak ko. May balak akong pagsabayin na lamang ito, pero hindi ko alam kung tama ito o mali.

Sa inyo nakasalalay ang pagkilos ko at pagtupad sa aking mga pangarap. Kaya naman, sa lahat ng makababasa nito, advice naman po? Salamat.

Sulyap 4: Pagtitipun-tipon ng mga Makabagong Filmmakers

Sa palago ng palagong industriya ng pagpepelikula sa ating bansa, hindi kaduda-dudang mayroong mga “new breeds” ng mga filmmakers na umuusbong at nangangarap na mapansin ang mga obra sa pinilakang-tabing, mainstream man o indie. Marami sa mga kabataang ito ay estudyante at patuloy na itinataguyod ang mga pangarap sa pamamagitan ng pagkikwentong biswal o paggawa ng pelikula. Hindi naman nagmimintis ang mga “old timers” na tumulong sa mga “new breeds” ng filmmakers. Nito lamang nakaraang tag-init, muli na namang itinaguyod ng mga kabataan ang kanilang mainit na pagmamahal sa larangang ito sa pamamagitan ng pakikibahagi sa mga pantas-aral na dinaluhan rin ng mga propesyunal na tauhan ng pelikula upang magbigay inspirasyon at magmulat sa pamamagitan ng pagtuturo. Isa sa mga workshop na ito ay ang hatid sa ating ng MaSKay Production (Malayang-Sining Kayumanggi), na tumalakay sa pagsilip sa paggawa ng pelikula. Dinumog ang kanilang inorganisang pantas-aral ngunit tanging tatlumpung mapapalad na mga kabataan lamang ang natanggap.

Ilan sa mga ispiker ng pantas-aral na ito ay mga propesyunal na filmmakers tulad nina Sir Ralston Jover (Kubrador), Direk Pepe Diokno (Above the Clouds), Ms. Alma Concepcion (Babagwa), Sir Carlo Mendoza (Bwakaw), Sir Aped Santos (Baler) at marami pang iba. Ibinahagi nila ang kanilang mga kaalaman sa mga kabataang ito at nagsilbing inspirasyon sa kanila. Matapos ang lektura na kanilang inihatid, binigyan ang mga kalahok ng isang linggong preparasyon para sa kanilang gagawing shortfilm bilang aplikasyon na rin sa lahat ng kanilang natutunan. Mula sa pre-production, sa mismong produksyon, hanggang sa post-production, binusisi ng mga kalahok ang kanilang ginawa. Kaya naman ang mga resulta nito’y magaganda at halatang pinaghirapan. Ilan sa mga entries o shortfilm na ipinasa ng mga kalahok ay ito:

1. Mr. and Ms. Righteous sa Waiting Shed
2. Ako ang Silangan
3. Lente at;
4. Ang Paghihintay

Nagkaroon rin ng mga awards sa msimong araw ng pagpapalabas nito. Ngunit, bago ang ginhawa, dumaan muna sa butas ng karayom ang mga pelikulang ito. May mga huradong humusga sa kanilang mga obra. Ilan sa mga ito ay sina Sir Ching Danseco (Ang Paghihintay sa Bulong), Knowledge Channel Representative (Pelikulab) at si Sir Aped Santos (Baler). Karaniwan ng mga concern ng mga ito ay tungkol sa Production Design at continuity. Sa huli, nasuklian naman ang pagod ng mga kalahok nang i-announce ang mga panalo. Sa bandang huli ng pagbibigay ng mga awards, ang nagwagi ay ang Streetlight Production na may pelikulang pinamagatang “Ang Paghihintay” sa direksyon ni Lourence Carale. Nagwagi rin sina Ace Spencer Apolonio sa walang tulad na paglapat ng musika sa pelikula. Si Shean Dajay sa napakagandang opisyal na musika/kanta ng pelikula (Naghihintay, maari ninyong pakinggan at i-download ang kanta sa pamamagitan ng pag-click ng link na ito). At si Jeanny Burce bilang pangunahing tauhan ng pelikula, at Taga-disenyo ng Produksyon kasama ang direktor na si Lourence Carale.

Ang mga pelikulang nabanggit ay opisyal na ipapalabas sa publiko sa Nobyembre kasabay ng mga entries ng Halo-halo Indie Film Festival, sa Conspiracy Bar, Visayas Avenue. Sana po’y magustuhan ninyo ang mga entries ng HHIFF at nawa’y masuportahan pa ang mga gawang Pilipino. Mabuhay ang mga aspiring/amateur at Professional indie filmmakers. Nawa’y makapagpamulat pa ng ibang mga kabataang may pagmamahal sa sining ang mga pelikulang ito.

Kung may mga katanungan tungkol sa pelikula at mga tauhan ng pelikula na binanggit sa itaas, maari lamang pong makipagugnayan sa blog na ito, sa MaSKay o sa mismong may akda ng mga pelikulang ito.

Ispesyal na pasasalamat kina:
Kuya Jojo (Jojo Nadela, bilang isang napakagaling na script consultant ng pelikulang “Ang Paghihintay”)
Prof. Joseph Gannaban (Aming provider ng mga gamit pampelikula, at provider na rin sa gitna ng kawalan, hehe)
Sa MaSKay na hinayaan kaming idiskubre at pagyamanin ang mga talento
Sa aming Gabay na si Kuya Mico Marasigan. Maraming salamat po, talaga
At higit sa lahat, sa Panginoong nagbigay sa amin ng pagmamahal at talento sa larangan ng sining.

Araw ng Pasasalamat

 

 

Sa lahat ng mga followers at mga viewers/visitors ng aking blog, Maraming salamat sa inyong lahat! Ngayong January 4 2013, isang makasaysayang araw ang nangyari sa blog ko, naging isa sa mga Top Blogs at Top Post (isa sa aking mga post) ang aking blog! Nagpapasalamat ako sa inyong lahat, at nawa mas lalo n’yo pang pagigtingin ang pagsuporta n’yo sa akin! Muli, maraming salamat sa inyong lahat! 🙂